قصيدة للشاعر هاني الحركة (الى الشهيد ساري)

إلى الشَّهيد ( سَاري )

هَاني الحَرَكة

==============

أهلاً وَسَهْلاً يا عَرَبْ (أبطال) = ويا جَامِعَه عمْ تُخْرُب دْياري
نشالله انبسطتوا بمقتل الأطفال = وْحَرْقة قَلِبْ أمّ الطُّفُلْ(ساري)
***
هيدا الملاك الطّاهر المظلوم = طيْر اندبحْ.. بالدّمّ عمّا يْعُوْم
وْأمّو تِهِزّو بْأيدها تَـ يْقوم = وعمْ تنْدِبوا يا حرقتي وناري
***
أنتو بشر .. أنتو زمر أنجاس = أنتو بِلا ديْن وبِلا إحسَاس
طفل البراءَه شو عِمِلْ يا ناس = ليش انقتلْ (ساري) بْطَلَقْ ناري
***
شو حامل بأيدو.. حِمِل بَسْكُوتْ = ومنشانها (ساري) الطُّفُل بيموت
لا حامل زمرّد ولا ياقوت = تا ينرمى عا هالأرض عاري
***
منظر مَآسي .. وَجَّع وْآلَم = قلْب الوطن ، يللّي ارتقى وْسَالَمْ
وينو الضَّمير الحرّ بالعَالَم = الْهَيْئه عَنِ الأنظار مِتْوَاري ؟!
***
(ساري) شهيد .. ويا عَرَبْ إجرام = دمّو بِرَقْبِتْكُنْ مدى الإيّام
تتعلّقوا نشالله بْحَبِل إعدام = بْحَقّ الإله الخَالِقِ الباري